Luk 16 | ASO | STEP | Izesu' aza izipahala zuho gamazi gohi ma ti' lo lo-ngimine': Heneni ve mali'mi heneni'velo' gizebo ve've ma minine'. A'mine henenilo' gizebo ve ne'mi gamazi've ma ti' li likevo heneni ve ma'mo giline': Henenilo' gizebo ve aza nene heneni do gopo' napa oga' neive. Ne'mine lani' gelo

Luke 16

Monovote Do Lisihe' Ogo Minaakumu' Gamazi Ato Ato' Moni Henenilo' Lo Molo Line' Gamazi

1 Izesu' aza izipahala zuho gamazi gohi ma ti' lo lo-ngimine': Heneni ve mali'mi heneni'velo' gizebo ve've ma minine'. A'mine henenilo' gizebo ve ne'mi gamazi've ma ti' li likevo heneni ve ma'mo giline': Henenilo' gizebo ve aza nene heneni do gopo' napa oga' neive. Ne'mine lani' gelo 2 henenilo' gizebo ve nene vise lo-do ti' lo lo-imine': Gaza gamazika ma lani' nene gelekuko nadi' ive. Gaza gohi henenilo' gizebo ve minamolosange. Nemu' nene gaza gono do'mo vo minaine' luhuvo ma nene do nelebizezo. 3 Ne'mine lo-davo henenilo' gizebo ve aza gala gelo ti' lo giline': Naza henenilo' gizebo ve minuvoni' maloti' nene do nohulo-nidiko nadi' olove. Naza savoli hizo ledo daa' amuzo'ne nomivo ido' evenetati' noso' nite' voku' lo dalosa novozo helalove lo giluvoni' nemu' nene 4 neze gono'neuti' nimisele hulavo naza vo evene' ma ingine numu'ningu' nele'mize mili di lamine' i-nidavo dizo lemo olongumu' nene engita inite' ma o-ngedelove. 5 Ne'mine lo gala gelo a'mine heneni velati' dina' ave nene hamo hamo' vise lo-ngedavo neida ani'. Ve mali'mo gomu' ogavo henenilo' gizebo ve aza ti' lo longo' o-dine': Gaza neni' gizebo ve'ne nabalati' nene inite' nanike' dina' ogo daine' neve. 6 Lavo ve aza ti' lo lo-imine': Noso' nite' gize vata' oga' uveli dalamu ngomo ngomo vanu hadeti (100) duvoni' ve. Lavo henenilo' gizebo ve aza ti' lo lo-imine': Lite' lo dina' aine' luhuvou' mene hadeti do hulo fifti (50) ve lo gizezo. 7 Ne'mine lo lo-do ve gohi ma nene ti' lo longo' o-dine': Ido' gaza nene inite' nanike' dina' o nane' neve. Lavo ve aza ti' lo line': Viti beki vanu hadeti duvoni' ve. Lavo henenilo' gizebo ve aza ti' lo lo-imine': Dina' aine' pepaka mene do hadeti do hulo eiti (80) ve lo gizezo line'. 8 Ido' me misubou' aleve O'mosomu' gilamani' nete engi' inite'inemu' inite' iga' naani' ne'mo nene O'moso'mi evenele lu'ningu' labana' ele neive nene ngivile' ivosa otohato inite' iga' naani' nenako a'mine do goloso oga' ive henenilo' gizebo ve nene otohato inite' ogave lo eze gizebo ve've heneni ve ne'mo nene opo'ni line' ve. 9 Izesu' ne'mine losa imine' molo gohi ti' lo line': Naza ti' lo nolo-lingimuve: Me misubo golosou' neine' heneni nene lengi' zogo vetine minilizangumu' ve li evene' zogo mili-ngidi ngimilo. Ne'mine ilizani' ne'mo alinge' heneni osu' liline' gamenela nene minevo' minevo' ebeku' nene lengele'mize lamine' ilisave.

10 Ve ma aza inite' ngomolokisi vomene do guno gizebo lamine' iline' nene inite' nabalo' nesi a'mine'mine ogo gizebo lamine' oloseive. Ido' ve ma aza inite' ngomo ngamalo' nesi nene do gopo' napa ogo mineline' nene inite' naba' nabalo' nesi nene do gopo' napa oloseive. 11 Ido' lingine me misubo golosou' neine' heneni nganeni nene ma di guni gizebo amilizani' nene lutine'mi heneni nganeni gihile lamine' nene zaho lengemelivoba ma lingimamilisave. 12 Ido' ve maliti initeto' gizebo lamine' i-ngidamilizani' nene O'moso'mo salani molo-lingidine' lengi' initetine gehepeve nene zaho lengemelivoba ma lingimamilisave.

13 Ido' gonou' ve mali'mo evene' sitato' nene mo gono ngelo damoloseive. A'mine ve sitato' gono dalosa iline' nene ve hamota ma lulo emeleseiha sita' nene lulo ngelo ngemamoloseive. Mala lulo emeline' nene mala lulo emamoloseive. Ido' ma velo' gi'mizo eze gono amuzo molo daline' nene ma vemu' gosele' belavo gono gamazi lo-deline' nene ngelo damoloseive. A'mine'mine ogo gaza monilo' gono do luka a'mine moniu' molo lamine' iline' nene luka O'moso emo gamazi lido' gele do eze gelekele' o-daa' anive ngelo minamolosane.

Izesu' O'moso'mi Lou' Gamazimu' Line' Gamazi

(Mataio' 11:12-13; 5:31-32; Maleko' 10:11-12)

14 Ne'mine lo lavo moni henenimu' lanite' gilaa' ave Halisaio' ve ingine gili gize' i-dani'. 15 Ne'mine ani'za aza ti' lo lo-ngimine': Lingine nene evene' ve'nido' veveso minunive ma nene none li amuzo mili inite' igi mili iga' naani'za lengi' lutine'mi monovo've nene O'moso'mo ha ningo gelaa' neive. Evenelite inite' ma di igi di hozi lilizani' nene O'moso'mi velelo' a'mine inite' nene muso gala dizaa' inite' lolo' oga' neive.

16 Lou' gamazi nesi ido' poloheteliti gamazi nesi nene mine do ogo mono' noso holo-ngedaa' ive Zohane' soto' ogo minine' gamenelo' nesi amuzo molo minine' ve. Ne'mine ogavo neloti' nene O'moso'mo gizebo o-ledelingumu' gamazi lamine' nene li soto' soto' igi nilavo evene' muki' nene a'mingu' vi hilalisa amuzo goloso mili vi hilaa' nave. 17 Ido' okulumo' misubo nene ha vi tolovo ilisido' i nizasine'za O'moso'mi lou' gamazi lingelati' ngomo nesi nene mo vo tolovo amo amuzo molo mineleseive.

Vene' nGimisele Hulaakumu' Izesu' Lo-ngimine' Gamazi

18 Ve mali'mo elenahine hulo-do vene' gohi ma daline' nene O'moso'mi lou' gamazi avuto' oloseinako lihime naba daloseive. Ido' vanahine hulo-dosa noline' vene' ve mali'mo ma daline' nesi nene lou' gamazi avuto' oloseinako lihime naba daloseive.

Heneni Vesi Lasalongisi Engito' Izesu' Aneza Gamazi Ma Lo Molo Line'

19 Moni heneni ve ma mino gamene gamene oko'nolo' inite' nene gulehe' kalehe' inite' lamine' taminekovo' ngolaa' ine'. Ido' noso' nite' neve lamine' taminekovo' no minaa' ine'. 20 Ido' a'mine heneni ve ne'mi numuno gatedo' nene goho' gahali' ma minaa' ine' nene gulive Lasalo'. Oko'nolo' huso'movo' o vine' mino 21 a'mine heneni ve ne'mo noso' nite' nalinguti' lumo sama do'mozeline' nalove lo vo minine'. Neivo gulo nete igi husolo' nene ge'ne ge'ne i-daa' ani'. 22 Neloti' alinge' a'mine goho' gahali' nene helavo O'moso'mi angelo' nete di vi Abalahamu' neingu' huli-dikevo maka' minasine'. Ido' heneni ve masi nene helavo galese izi-dani'. 23 Ne'mine i-dikevo aza nene lovo' lovo' ogo minaa' ine' oloku' nene vo mino mulumo alumo naba goloso gelo minine'. Mino ninge hulo veleta ine' nene Abalahamu' aza hoto' goloso hozene neivo ningo goho' gahali' Lasalo' nesi maka' Abalahamukisi nizasivo ningine'. 24 Ningo moni heneni ve aza ti' lo vise line': Abalahamuvo me'neho make, oloku' mene mulumo alumo gelo nouze. Neni' nene mulumo'ne gele-nido Lasalo'ni nene imiselanivo lemo ogo nosou' ana lolovolo' lupizeko ve'ne nahunolo' mene do gelavo hongu lo-nideliho lo line'. 25 Ne'mine line'za Abalahamu' aza ti' lo lo-imine': Gipe'neho, idise mene gaza gaka ma gele'nazo. Gaza misubouko gomu' vekasi mino inite' lamine' tamine' ningo do nanivo Lasalo' nene mulumo alumo gelo mino goho' gahali' minine' ma neine'za idise nene ele'mize lamine' navo geze ma nene mulumo alumo goloso gelo nane. 26 Ne'mine ogo nane' nenevo' nevoba leze mela nonivo lingine minikevo olusoteu' nene O'moso'mo avese naba molo neive. Ne'mo nene mela nizave nete a'mine avese nene avuto' igi vi helala vilisa ilizani' nene ngeli vamilisave. Ido' nela nizave nete a'mine avese nene avuto' igi mela alisa ilizani' nene ngeli amilisave.

27 Ne'mine lavo moni heneni ve aza ti' lo line': Ne'mino neine' neivo ma nene me'neho make, neze naku'ne zuho faef (5) ne'mine nizani' nene mulumo alumo gelaa' ebeku' mene inginesi ikelizaze. Lasalo' nene imiselanivo me'nehi numuda vo hungo' ngemo ga'ine dalive. 29 Ne'mine lo line'za Abalahamu' aza ti' lo lo-imine': Inginela nene Mose' gamazisi ido' polohetelite lani' gamazisi nene neine' nenako a'mine gamazi nene gililizado' o neive. 30 Ne'mine lavo heneni ve aza ti' lo line': Abalahamuvo me'neho ve, ne neiha o'ove, evene' ma hilikedati' vi gamazi li-ngimilizani' nene lu'ine di velepe' izilisave. 31 Ne'mine lavo Abalahamu' aza ti' lo lo-imine': Ido' Mose' gamazisi ido' poloheteliti gamazisi gili damilizani' nene ve ma helosa tine' molo ogo lo-ngemeline' nesi nene ma gili ele'vole' igi gili damilisave.